مجموعة شعرية اولى

استعرض الموضوع السابق استعرض الموضوع التالي اذهب الى الأسفل

مجموعة شعرية اولى

مُساهمة  ربيع سعداوي في الجمعة فبراير 01, 2008 2:33 pm

لا هان من يقول: الله ربي

لا هنت ولا هــــــان عربي منـــــا
لا هان مـــن يقـــــول :الله ربـــي

الغريب ذيب في مقـــــال معنــــى
وفي مقالي الخو قد يكون غربــــي

رب اخ لم تولــــد في يوم امنـــــا
الاخ الشقيق احيانا يبيع ويــــربي

من يوم دخلنا بيوتكم قولوا عنـــا
واش ريتوا ...شفتم كيف نبنــــــي؟

القلب بالحب مليان...... والله عرفنا
اهل خير..اهل ضيافة ..كيف نخبي؟

يشهد الرب بيكم احنا والفنـــــــا
وغيبتي هذا الايام باسباب غلبي

مشغول بحرب ..مـــــرات هنــا
ومرات هناك...الرب واقف جنبي

سال موقع مكتوب..سال عربنـــا
سال ماريتا ورامي..يقولوا :عربي

نطـــــــلب السماح اذا قصــــترنا
السماح ..السماح..من عمق قلبي
شلغوم العيد 27/04/2007
*************************
الله....اشحال العتاب يداوي

الله.. اشحال العتـــــاب يـــــداوي
وياكم مريض يــــشفي وجـــريح

الدنيا ملــــيانة بـــــــــــلاوي
و كم واحد فـــــي البــير يطيح

لا تكفر خــــوك سعــــــــداوي
لا تــقول عــني فتـــان قبيـــــح

يمكـــن كلامي ماوش سماوي
لكـــــن نظن كلامـي مليــــــح

بوش ..اشكون جرايمه يلاوي؟
من يقبل ويرضى بهذا الشطيح؟

جرايم وليداته:خاوي بن خاوي
حكامنا كــلاب حتى في النبيح

شوف الاسم ماخوذ من الزرقاوي
سمير مصعب..من غير توضيح ***

واش تبغي نقول عن مـــالاوي..
نجيب اسم غيرالاسم الصحيح؟

الدين سياسة موش بخور وجاوي
الدين صح موش شتم وتجريح

الدين ماهوش نبيع الكـــــــلاوي
ماهوش نسمح في عرضنا ونبيح

شلغوم العيد في يوم 28/04/2007

*** السلطات الامنية الجزائرية اعلنت عن مقتل من اسمته سمير مصعب على حد تعبيرها قيادي في القاعدة بالمغرب..

القصيدة رد على اخ بالموقع الفريق الاسلامي للبرمجة
****************************
ما زلت قري...

انت ودرت علي?افهمت كنت مقصود?
واش نسيت شهادتك في السابق ليا

ما زلت قري...الطريق مازال ممدود..
ما تنفعك روحك..لا هذا الشيخ البلية

سبق السيف العدل...اولاد عمامك شهود
تعيش تحت رجلي ما طالت الدنيا

النمشي?تعرفني ..تعرف افضالي والجود
تعرف لساني وكيف انظاف يديا

الحق مر...خليك مع الحريم قعود
موت بالغيض... شوفي شغلك انتيا
**************************
حتى الوقت اختير

حتى الوقت اختير لاعدامك صدام
هذي صورة ورمز لاعدام العرب

يجي دورك قزوم علىيد الاقزام...
يجي دورك يا حسين..العب بارك العب

وانت يا الخامس. كمم للافوام
باسم الله ابدا واكذب كيف تحب

ويا الدا مبارك سير وامشي للقدام
قول اخوان..اخوان ...وبقوة فاضرب

يا سيدي السلطان رايس في الحمام
تبغي منشفة ازرب لا تغضب

نعرف شرفاء يا ما سمعنا كلام
نعرفكم سادات في السرقة والنهب

مجرموا حروب وما داره بتمام
ما يجي في ذرة من جرايم كلب
********************
في اغتيال صدام ايضا

الراجل اذا مات مات راجل
والسبع ما ترهبوا الضبوعة

صح مات كبش ..صح مات قاتل
صح مجرم كبير وصاحب ميوعة

لكن الصح ثاني الحكم بالكامل
اولمرتي...بوشي..ملامحه شنيعه

لكن الصح امتنا من بطون وقبايل
اولى بحقها منه وفيه في الطليعة
******************************
نفخر ونعتز

نفخر ونعتز لو نكون كثيري*******ويشهد ربنا على صدق ما نقول

والله حبكم يملا روحي وضميري*******بعد ما املا قلبي على طول

حبكم يا خاوتي حاضري ومصيري*******حبكم ما مثله بخاطر يجول

يا هذا..خليني اخترت مسيري*** ***انا عارف صلاحي مانيش بهلول

خليك بعيد...يا ويلك من كيري******شفت ناري نارين تصلي وتصول

هم اهلي.. هم عوني ونصيري****** هم اصحاب السبق و الفضول

هم هم ..قل هكذا وكون ظهيري**** امش معاي..خليك من الطبول

من زمان تصفق.اشكون التكفيري? **اشكون القاتل واشكون المقتول?

بكم اشريت ها الوسام القزديري ?* بدمك وعرضك?نظن موش معقول?

بعت دينك وامشيت ورا كل تبشيري?*ارضيت بالذل ?ما زال الليل يطول
شلغوم العيد في 28/11/2006
*****************************
كيف تقيس حب الله لك

الرب اذا حب عبده حببه للناس//////// نعم سيدي وزاد......زاد حببهم ليه**1

هزه حطه في مقام مرفوع الراس ///////وللملايكة ثمه يقول = نوصيكم بيه

صح انا اشعث واغبر لكن تراس//////// يبرني بالف خير لو اقسمت عليه **2

لا تسال كيف يحيي..لحديث قياس/////// كيف ينصر..كيف..كيف يبسط يديه **3

من اثنين وثمانيين وهو عساس ////////قرب.....قرب تشوف المكر بعينيه

هاو ..هاو بير منين رايح يغواس /////////هاي حفرة هنا...هاو زرداب الهيه

اكسر وذنك.. تسمع في الرصاص?/////// مت?مازلت حي وحقي منهم نديه

والله وراهم ما دامت الانفاس ////////يتفلسفوا?الشعب غاشي?انا نحميه

وليداتي افرحو بالكبش واللباس ا////////للي معاه الرب لا من يقدر عليه
في 29/12/2006 ال4و22

للشرح/1و2 اقتباس من السنة المطهرة
3-اشارة الى الاية/ رب ارني كيف تحيي الموتى
****************************
المومن وخوه بنيان

المومن وخوه بنيان مرصوص
وانا بلا بيكم ما نساوي شـــــي

يمكن نصير شاعر مخصـــوص
تشرفت بيكم وارجعت قـــــــوي

خوذوا بيدي ..في الايام النحوس
اعطيوني الحب شوي شـــــــوي

نعرف قدري في وقوفي وجلوس
وهذا من فضله وجوده علــــــي

الحمد لله برحمته محــــــــروس
الحمد والشكر لله نروح ونجـــي
******************************
من الغيرة
هل جزاء الاحسان الا الاحسان..على فكرة نشرت هذه المقطوعة بالموقع عربنا..اليوم فقط
رد على قصيدة مشحونة بالعواطف النبيلة

من الغيرة على الشعر جا ردك بخشونة
ومن الغيرة يا خوي غير ارجع لصواب

ما تكسرت جرة اقوالك ماشــــــي شينة
واختلاف الراي ما ندير هش اسبــــاب

شهم انت ..والله كل مجاملك زينــــــــه
كاين فيك الخير ......نبعث لك بجــــواب

شوف ردود الناس...كل واحد بعينـــــــه
لـــــــيش تفزعنا ?ليش?قال سيدنا بالباب

سلمت..سلمت للجميع..انت اكبر من ان يلعب براسك الشيطان
شكر ومحبة
**********************************
تستحق كل شكر وتقدير

تستحق ننزلوك مكانك******تستحق كل شكر وتقدير
تستحق كل محبة عل شانك**يا مدمن الشعر..لا الشعير
نعرف طبايعك وخضالك***** شهم صح من غير تفسير
في منامي نشوف لخيالك****وفي يقظتي بجنبي تسير
ليش فزعتنا..بربك واش بدا لك***تهزر معانا...رعدت كثير
تسلم وصح الله لسانك****يا الخو ..صاحب الصدر الكبير
******************************
انا عبد ضعيف

ما نعرفش الحسد...والله نغير عليك****كل الناس نحب ونبغي لهم الخير
كان غلط الخو ..نقول الله يهديك*****اشكون المعصوم بجاه الرب لكبير
من الحبة قبة? مد انت يديك******** الايام وحدها تكشف واش يصير
انا عبد ضعيف والله نقوى بيك****** **نغزو لليهود ... وندير واش ندير
حتى وانا نقول كلامي ماوش ليك*****ما تقراش النقص انا خوك صغير
سيدي واش تحب? قول اللي يرضيك***عيبنا احنا لعرب نحفر بير وبير
من جرب وشاف..يا سامع نوصيك******لا تحقر للعود قد يكون نصير
كل ما الطير اعلا يصغر في عينيك*****ما نيش مغرور ..اعلا انتاي وطير
احسب بارك وزيد ..واضرب برجليك*** ما تخرقش الارض من تراب حقير

شلغوم العيد في28/12/2006 الساعة 7 و37دقيقة قد تكون لها تتمة
**************************************
مسكين من لاشاف

مسكين من لاشاف ولا عرف واش يجري
من مدة في بلادنا.........ام المعجــــــزات

والله لا يتلام...ومعروف من بكـــــــــري
النايم حتى يفيق..والاعمـــــــــال بالنيات

سالوا من جرب...خســــارة يا عمـــــري
ما زال نومن احنــــــا بالشكليـــــــــــــات

ما زلنا لليوم واحد ما يــــــــــــــــــــدري
وزعمة مسلمين ومن نسل الســـــــادات
*******************************
رب قدرني باش نعمل للخير

رب قدرني باش نعمل للخير*******واكتب لي عندك بعض الحسنات
انا عبد ضعيف لا جناح بيه نطير***** مقصر في حقي .....هذي سنوات
من جهة مسؤول باش ندير تغيير****ومن جهة مغلوب بفعل السياسات
نشكي لك ضري يارب الكبير ********يارب الاكوان ورب المعجزات
*******************************
ليك نحب الخير

ذو الوجوه يجي نهاره ويتقضح ****والنية ترفع وتزيد في الاقدار

مهما الناس تقول عمري نتزحزح*****واللي بيه نحس ما يبقاس اسرار

ديما هذا القلب بورود مفتح********ما نضمرش الشر وما نيشي غدار

ليك نحب الخير وكي نشوفك نفرح***وياما فيك نقول ونفرض ثم اشعار

تعجبني البسمة للسعد تلوح*****يعجبني قدك مسبوغة الاشفار

تعجبني عينيك من نظرة تجرج****يعجبني العقل والزين المسرار

حبي ليك كبير كان تبغي للصح**** سميه الجنة والا قولي نار

لو نصيب السما نرجعها مطرح*****ونبعد..نبعد بيك ما طالت الاعمار

لكن يا حصراه قليل اللي ينصح****ويا خسارة على الزمان للراجل نكار
**************************************
حشمتك بالله

من غير ما تدري تنساق للجزار****وبيدك تضرب روحك يا مسكين
حشمتك بالله تحكي لي ما صار **** وتقول لي وين هي تربية والدين
واش اللي خلاك متشبع بافكار****يدي فيك الموج غارق للوذنين?
تومن بالعلوم?علاش قاعد في الدار ***وغير للفضاء هاو غزا من سنين?
هات اللي قدمت نقرض فيك اشعار***ونصفق عليك مني ليك يمين
*************************************
الف الف سلام
كلامك عسل بالتمام** ****مني ليك الف تحية
فكرتني بيوم الزحام****** رتبت حروف الابجدية
بدوي نكًـاسالعــمام*****بدوي صح وولد عربية
***********************************
زواج المتعة قره صاحب شان

يا رب يا كر يم تعلم ما بي*****نشكي ضري ليك خارف انت رحمان
عمري ولا حبيت في هذي الدنيا***وكي حبيت حصدت لرماد ودخان
شفت السما نقطة وريتها يعيني***وضاقت الارض—اعيات عن همي واحزان
وين حمامتي اللي ربيت بيدي?**** غير نبتت للريش قالت/في الامان
يا درى تتفكر الايام بهية ?******للورد والريحان يفرش كل مكان?
يا درى راهي بخير صدت علي?***من يدي لها سلامي?انا خيكم غلبان
ما تعرفش اصلاحها معذورة هي****هذا الزمان يغر لرجال ونسوان
كي كثرت الاحزاب واضحة لقصية****ويكفي ما بنيناه هاهو راب الان
جدي الريم ينباع بسةمة دونية****والراجل ما بقاش يسوى من زمان
واش غادي نعمل يا سامع لي?*****واش تبغيني نقول?والله حيران
كان تحب تعيش حاجتك مقضية******صفق ..صفق..زيد ارقص في الميدان
خلط وجلط ..وكعبر شوية *****وامش على كرشك هكذا رايح تبان
هف وسف وقول ديمقراطية****واحلف باش تموت وانتاي تخمان
لا تحسب للعار وازرب يا خويا******قبل يوت الحال وما تصيبش لتران
قدامك فرصة وساعة مواتية***** افتح عينك شوف وين عاد الجيران?
هذي حضارة وموضة عصرية***** هذا زهو كبير ينسي في الانحان
هذا تقدم وهذي حرية/********مفروشة البيوت مفتوحة البيبان
A votre sante الكبدة مشوية***I love you today…I love you egain
حمسة الاف وحدة وغير المصرية*****زواج المتعة قره صاحب شان
************************************
حطمنا الاقام ديما مغلوبين

هم الزمان صعيب يا ما شيب راس****طيح وهبط بارجال ونساوين
من المقهي للسوق والحديث قياس***غير نكالي حيوط هذي اعوام وسنين
كيف الربح يجي ونعيشوا لاباس ?****ووقتاش رايح نفيق ?زعمة مسلمين
دم الشهدا اعلاش اليوم ارخاس?****عيب علينا وعار ننسى للوالدين
واش قيمة مفام بلا ساس*******عمره الشكل اغنى للي وحهه شين
شعبنا معروف يا ذل اجناس******ركع لفرنسا قبل الوقت يحين
واش اللي خلاه لا هرواة لافاس?****ما يعرف كيفاش قوته يجيب ومنين?
قريب لعشر سنين قطعنا منه الياس*على كرشه يمشي كيف لحنش مسكين
حشمتك بالله كاشمة معاك اقراص?**كاشمة سيروات تنفع مغبونين?
نصلي في رمضان نبركه كي يخلاص***وبعد الحج نهج نولي شياطين
هاك تشوف في الدم وتشوف الاحباس**منين رايحين احنا نغرق للوذنين
يا ما صالونات فيها ندير اعراس****جتى اللي ما امشاو صاروا شطاحين
ورا كورتاج كورتاج وغير الميسيداس***نجري ورا لبنات بيهم مشغولين
في السرقة وles blagues والله نجيب الكاس***حطمنا الاقام ديما مغلوبين
***************************************
خطوة..خطوة

خطوة..خطوة احنا نمشي للقدام****لشمال ويمين تدي فينا الريح
ما يخفاش عليك هذي سنين واعوام***عمرنا ميزنا بين مليح وقبيح
ما عرفنا لحلال..ما عرفنا لحرام******حتى الشيخ اليوم عاد مسكين يجيح
في رمضان نصوم نصلي ورا الامام****وقبل العيد ندير من الصلاة ذبيح
يوم الوقوف هناك نسبق للاقوام****نشبك بالكعبة...نبكي حتى نطيح
بصح غيبر نرجع ندخل في تحرام****نتعرى من مخيط راه كلامي صحيح
حشمتك بالله تفسر لي الاحلام****وتفتي لي ولو على دين المسيح
واش من جنس احنا?ما نا من الانعام***ما نا كالجماد عن طبعه ما يميح
زعمة متقدمبن?فينا غير الافوام*****واش قدمنا تراش هاو الوطن جريح?
اشكون اسباب الدا تفشى في العظام?**وكبف امسينا القتل ليل نهار نبيح?
مرت خمس سنين بكمالها وتمام****نشيع للموتى يا خسارة بشطيح
*************************************
ابكي ياعيني

شعبنا معروف خالق معجزات****واش اللي خلاه يستورد الابره?
ياخي الاستقلال جبنا بارادات***وخرجنا العديان...ذوك الكفرة ?
ياخي زعمة احنا علينا رايات***وقداش من مصنع وضعنا له حجرة?
قداش للعلوم بنينا جامعات?***وقداش بالدفيز سلكنا دكاتره?
ابكي ياعيني وجودي بالدمعات***ما يخفاش عليك..راني في حسرة
من ايام طوال قولي سنوات****مالكني التخمام وعايش في حيره
من يخدم لبلاد?يزي شعارات***ياك اللي جيعان ما يبغي هدره?
يزينا تسفسيط والمعيشة غلات?***يزينا تنفيق وغدره على غدره
كذاب من يقول درنا اصلاحات****سياسة فرق ظهرت مره اخرى
وكثرة الاحزاب ما تنفع..هيهات****يغرق البابور رياسه عشره
كثرة الاحزاب ما عندها باه جات***ولا دارت حاجة تنال بيها شهره
منذ اكتوبر واحنا في غصات****وبالعينين نشوف مناكر حمرا
من نبش القبور لحرق الوزنوات***ومن اضراب لاضراب على حساب الكسره
كل من هب ودب يحظى بموافقات***وما عليهش يحون ما يعرف يقرا
ما عليهش يخدم جهة من جهات***والا كان قومي ايام الثوره
ما عليهش اذا جانا بفلسفات*****قورباتشوف اليوم منها يتبرا
**********************************
لبلاد راهي خلات هذا ماوش كذب

يا سايلني واش تبغيني نقول
ما ناش مسلمين وما بقيناش اعرب

افتح عينك شوف تلقانا بذيول
طوالو و\نينا وفي اخر الركب

تلقانا ناسيين لارواحنا على طول
ومتعودين اشحال حاجة تجيب السب

سباقين في اشطيح والضرب على طبول
وفي les blagues احنا عندك ما تحسب

على كروشنا نجري/شبابنا وكهول
ما نعد للطيحات وبهادل نكسب

في السرقة قداش جبنا من اصول
واشحال من مبدا عنه عجز الغرب
ب
الك يخدعك الكلام المعسول
لبلاد راهي خلات هذا ماوش كذب
*********************************
يعطيك العافية
السلام يجيب السلام *****يعطيك العافية ياخويا
كلامك عسل بالتمام** ****مني ليك الف تحية
فكرتني بيوم الزحام****** رتبت حروف الابجدية
بدوي نكًـاس العــمام*****بدوي صح وولد عربية

ربيع سعداوي
Admin

عدد المساهمات : 138
تاريخ التسجيل : 19/01/2008

معاينة صفحة البيانات الشخصي للعضو http://rabaisaadaoui.montadamoslim.com

الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى